38:56

Ep. 07 Apr 23, 2026

Wortwörtlich da Boda unter da Füass verlora – Elena

Hüt wird’s im Bündnertalk so persönlich und ächt wia no nia. I dr neusta Episoda sitzand d’Elena und i im Studio. Miar redand über as Erläbnis vor weniga Täg, wo üses Läba fast für immer veränderet hätt. Uf ara Wanderig zwüscha am Fürhörnli und am Montalin bini uf 2000 Meter Höhchi usgrutscht und 150 Meter an 45-Grad steila Hang abagstürzt, han mi mehrmols überschlaga und bi schlussändlich im steila Hang ligga bliba. D’Elena hät dr ganzi Absturz müassa mitaluaga und hät im erschta Momänt gmaint, das i sterba. I dera Episoda teiland miar baidi ganz offa üsi Sichtwiisa vo dem Tag. A Episoda über d’Zerbrechlichkeit vum Läba, dr Wärt vu Schutzengel und d’Fähigkeit, au nachama Schock wieder s’Positiva z’gseh. Patschifig, nit perfekt, aber ztiefst ächt.

32:08

Ep. 06 Apr 9, 2026

Perspektiva im Alltag – Ismael

I dera Folg vom Bündnertalk hät dr Ramon dr Ismael us Felsberg zu Gast. Miar redand drüber, wia dr Ismael noch sim erschta Surftrip in Spania d’Abwechslig gschätzt hät, aber trotzdem gera in Graubünda dahai isch. As kunnt as ehrlichs Gspröch uf über Fehler im Job – wia wenn dr Rasamäher uf Beton trifft – und warum s so wichtig isch, Kollega z’ha, wo eim sägend, dass alles guat kunnt. Dr Ramon verzellt offa vo sim Studiaabbruch und wia eim dr Rat vo Kollega dr Wäg zeiga kann. Zum Schluss erklärt dr Ismael, warum Gfüahl zwar guati Begleiter, aber schlechti Leiter sind und warum er jeda Morga mit 100% Isatz startet. Ganz ächt und patschifig.

21:04

Ep. 05 Mar 26, 2026

Bewundert ma nur was ma selber nit chan? – Annemarie

I dera Folg vom Bündnertalk pickt d’Anne folgendi Frog: Welli Eigaschafta bewunderisch du an anerna Lüüt? Us dära Frog ergit sich a richtig ehrlichs Gspröch über üsi eigna Schwächa und d’Stärka vo üsam Umfäld. Miar redand drüber, wiso üs Sprachtalent so fasziniarand, was es bruucht, zum Lüüt würkli zemma z’bringa, und wia vill inneri Ruah as bruucht, zum unter Druck d’Nerva nit z’verlüüra. Ä Gspröch über Identität, persönlichi Wärt und d’Frog, wieso d’Entscheidig für Latinisch z lerna in dr Schual villicht doch nit dia best gsi isch. Ganz ächt und patschifig.

23:32

Ep. 04 Mar 12, 2026

Über Gfühl reda isch wia Isbada, usafordernd aber tuat guat – Serena Schlüter

Hüt wird’s ehrlich. Mir startend wia gwohnt mit as paar klassischa Entweder-Oder-Froga zum Warmwerda: Dessert oder Kraftsport? Früahufsteher oder Nachtmensch? Denn tauchand miar aber tüüfer i: Miar redand über dä Schmärz, wo ma nit gseht, aber am maischta gschpührt. Ischs schwirig? Jo. Ischs wichtig? Definitiv.

33:10

Ep. 03 Feb 26, 2026

Miar wönd doch alli nur Glücklich sii – Thaddäus Krause

“Miar wönd doch alli nur Glücklich sii” das isch öppis wo da Thaddl erkennt hät, doch was wünscht er sich und was für Wünsch machand sicher nid Glücklich. Chama vo Musig süchtig werda oder nid? Um dia und wiiteri Froga gohts i dera Episoda.

41:17

Ep. 02 Feb 12, 2026

Wenns nid eifach isch – Valerie Mirindi

“As brucht da Winter zum da Summer z gnüssa” – das isch a Grundhaltig wo da Valerie Mirindi het und au usläbt. I dera Episoda redamr über sin Wäg als Standup Comedian, über Gäld, schwirigi Ziita und was einem dabi Hilft zum dura bissa. Schrib doch ind Kommentär was diar in schwiriga Ziita gholfa het.

19:10

Ep. 01 Jan 29, 2026

Veloschlüch wechsla und anderi green Flags – Annemarie

Alli Fraua findends guat. D Annemarie au. An Ma muas an Veloschluch wechsla chönna. Das isch as super Indiz für handwärklichi Begabig. Über sötigi und anderi wichtigi Kriteria diskuatiaramer i dera Episoda. Quizfrog and Tiarliabhaber: Was für as Tiarli pfiift im Intro und Outro?

0:38

Jan 26, 2026

Trailer

Neui EP jeda zweiti Donnstig, 5i am Morga Bündnertalk – Ehrlich, spontan und mit Härz Ächti Gspröch ohni Skript. I, dr Ramon Heeb, träffa spannendi Menscha us Graubünda und vo wiiter wäg. Miar reden über ds Läba, Freud, Arbet, verruckti Idea und alles, was grad so passiert, genau so, wia’s im ächta Läba isch: nit perfekt, aber ächt. Immer patschifig und garantiert nia langwilig!